حلاوة الروح

 اللي يقولك استحمل او اللي يلومك علشان معملتش او اي حاجة… قوله انك ماشي بحلاوة الروح … مش بالروح.

طوبة

اللي قالك العمر لحظة مقالش كل الحقيقة… لأن العمر طوبة.

مش تريقة و الله و لكن فعلاً العمر طوبة… طوبة طايرة كمان.

بنفضل طول عمرنا مش حاسبين حساب الطوبة دي…ماشيين جنب الحيط علشان نعيش…. 

نشرح اكتر؟ حاضر.

و احنا صغيرين ، اتعلم العوم، متدخلش تعوم في الغويط لتغرق، البس العوامة، الخ الخ.

متقربش من البوتجاز لتتحرق، متلعبش بالكبريت ليحرقك، اوعي الشمعة تقع عليك، الخ الخ.

متجريش بالعجلة وسط العربيات، متمشيش في الشارع، اطلع عالرصبف، الخ الخ.

و نكبر شوية و يبقي اتعلم السواقة كويس، سوق علي مهلك، بلاش سواقة متهورة، الخ الخ.

و نكبر شوية كمان، ادعي اول ما تركب الطيارة، اربط الحزام طول الرحلة، الخ الخ.

ونكبر شوية اكتر،  لازم الواحد يلعب رياضة علشان الصحة تبقي حديد و تطول عمرك، الخ الخ.

و طول عمرك، كل كويس، كل اكل صحي، حافظ علي وزنك، الخ الخ.

و لما تعيا، لازم تروح للدكتور و تاخد العلاج في مواعيده، سنانك، عنيك، ضهرك، ركبك، قلبك، ضغطك، الخ الخ.

و انت عملت كل اللي قالولك عليه، و حافظت علي حياتك و مشيت جنب الحيط، الخ الخ.

و هوب يقولولك عندك سرطان، عملية، كيماوي، حقن، تحاليل، قلق و خوف، و تسليم بأمر الله و ربنا يكرمك و تعدي، و تراجع كل اللي كتبناه من الاول و تسأل هو انا نسيت حاجة معملتهاش، الخ الخ.

المهم نجيت وعديت و انت دلوقت عندك بقي خطط للمستقبل و شايف الحياة قدامك من جديد، و ناوي تعمل و تسوي و بتظبط و ترتب علشان مشاريع شغل، او مشاريع حياة، الخ الخ.

و هوب و انت ماشي، او بتجري، او راكب، او سايق تيجي طوبة طايرة من عربية نقل او عجل عربية نطرها من عالارض، او عيل واطي حدفها من علي كوبري، الخ الخ … المهم الطوبة نزلت علي دماغك و رشقت و كانت هي الطوبة…

خلاص بح مفيش الخ الخ.

كل حاجة بتعدي (ؤ لا مؤخذة)

 يوم لعين تاني، ٢٩ أكتوبر ٢٠٢٤

تم إبلاغ حظرتنا بخبر مش ولا بد ... خبر مش ممتع و لا مريح و لكن كما يقول الفرنجة: ات ايز وات ايت از.

اشعة مقطعية بينت ورم ٤ سم (سنتي متر) علي كبد حظرتنا.... أصلها كانت ناقصة الاربعة سنت دول الصراحة

المهم، قالك ده و لا مؤخذة كدة مسرطن سرطنة مش حلوة و لازم نشيله..... تشيل مين يا عم الحج؟ الكبد؟

قالك لأ نشيل الورم... اسبوع اتنين قول ست اسابيع و لقيتني بتبنج و رايح في احلاها نومة.... و صحيت خير اللهم اجعله خيرلقيتهم بيقولوا خلاص... شلناه....

يا نهار اسود شيلتوا ايه؟ ال......؟ 

قالك لأ.

امال ايه؟ الكبد؟

قالك، هو يعني مش كله....

مش كل ايه يا عم الحج؟

قالك مش كل الكبد، يعني ٢٠٪ بس... الورم و ٢٠٪ مالكبد، و بالمرة المرارة (حاجة كدة فوق البيعة) 

بس؟ الله ينور عالجدعنة.... المرارة فوق البيعة

المهم.... الحمد لله... عفكرة يعني ... الكبد هو "العضو" (لا مؤاخذة) اللي بيكبر تاني (لا مؤاخذة برضه)

و التحاليل اكدت السرطانيشن بتاع الورم... الحمد لله علي كل شئ

و شغال دلوقت كيماوي و ما ادراك ما الكيماوي... ما علينا.

 كما قال الفيلسوف الكبير : أميرعيد: كل حاجة بتعدي