Skip to main content

مش مذكراتي

بقالي فترة و انا خاطر علي بالي اكتب ذكرياتي (مش مذكراتي)... مش عارف ليه؟ هي لا تهم حد و لا تفرق مع حد... و لا يهمني لو حد قراها او حتي شافها.... بس برضه ذكريات كتير بتمر علي بالي زي شريط السينما و نفسي لو اقدر امسكها و اسجلها و احتفظ بيها... لحسن انساها... احساس غريب...شكله السن. ذكرياتي هي ذكري ايام جميلة مرت أو ايام حزينة عدت و اكيد في ايام كئيبة بنت لذينه... و لكنها لسة ذكريات... ذكرياتي... انا............. أه و حاجة تانية ده أحلي مكان للتنفيس عن اللي بيدور جوة دماغي... من غير التنفيس ده ممكن البالونة تفرقع.

العيا الوحش… وحش

 ا طول عمرنا و خلال حياتنا جاتنا اخبار مش ولا بد… فلان عيان … اه ، العيا الوحش (امي الله يرحمها كانت متقولش سرطان ابداً… تقول العيا الوحش و كلنا فاهمين)… فلانة ربنا يخفف عنها جالها العيا الوحش…

مروان صاحبي من ايام الطفولة الحمد لله اتعالج من العيا الوحش و خف… بس هوپي صديق الطفولة و الجار الجميل اتوفي بسبب العيا الوحش… بتسمع و بنسمع الاخبار و يا إما تدعي بالشفاء او تدعي بالرحمة و المغفرة او تهنئ بالشفاء و انت حاطط ايدك علي قلبك لحسن التهنئة تتغير بعد شوية و …. العيا الوحش … وحش .

كل الاخبار بتبقي نسبياً بعيدة عنك و مدخلتش بيتك… و لكن … العيا الوحش لما بيدخل بيتك اول حاجة يعملها انه يخبط كل اللي حواليك علي دماغهم…

العيان بالعيا الوحش بيبقي حامل هم اللي حواليه و اللي حواليه محتاسين و مش عارفين يحمله همه ازاي… يساعدوه ازاي؟ يخففوا عنه ازاي؟ يحافظوا علي معنوياته عالية ازاي؟ 

محتاسين حوسة اكبر … ازاي يمنعوا نفسهم من التفكير في بكرة و اللي حيحصل فيه!!! ازاي يبعدوا بكرة او يأجلوه او حتي يلغوه و يخللوا النهاردة يوم لا نهائي…. او انهم يفضلوا يحلموا انهم يرجعوا لوقت قبل العيا الوحش و ان عمرهم ما يوصلوا للنهاردة… مش علرف… مش قادر… صعب.



 




Comments